तेह्रथुम पावर कम्पनीको प्राथमिक शेयर (आईपीओ) बाँडफाँड भएको छ । शुक्रबार ७४ हजार ४०० जनालाई गोलाप्रथाबाट १० कित्ता शेयर बाँडफाँड गरिएको बिक्री प्रबन्धक एनआईबिएल एस क्यापिटले जनाएको छ । यससँगै आईपीओमा आवेदन गरेका ८ हजार ८२० वटा आवेदन रद्ध भएको छ ।

कम्पनीले भदौ ९ गते देखि १३ गतेसम्म खुला गरेको शेयरमा २३ लाख ५५ हजार ४४७ आवेदन परेको थियो । त्यसमध्ये ८ हजार ८२० वटा आवेदन रद्ध भएको हो । २३ लाख ४६ हजार ६२७ वटा आवेदन योग्य भएका थिए ।

आईपीओ खरीदका लागि सर्वसाधारणबाट माग भएको तुलनामा ३९।३४ गुणा बढी २ करोड ९३ लाख ७८ हजार ४०० कित्ताका लागि आवेदन परेको थियो । त्यसमध्ये १ लाख ८ हजार ७६० कित्ताको आवेदन रद्ध भयो भने २ करोड ९२ लाख ६९ हजार ६४० कित्ताको माग सदर भएको थियो ।

कुल आवेदकमध्ये २२ लाख ८१ हजार ०४७ (कुल सदर आवेदकमध्ये २२ लाख ७२ हजार २२७ जना) को हात खाली भएको छ । यो संख्या कुल आवेदकको ९६.८४ प्रतिशत (कुल सदर आवेदकको ९६.४७ प्रतिशत) हुन आउँछ । यस आधारमा हेर्दा कुल आवेदकको ३.१६ प्रतिशत र कुल सदर आवेदकको ३/५३ प्रतिशतले मात्र शेयर पाएका छन् ।

एउटै निष्काशनमा साढे २३ लाख वटा आवेदन पर्दा साढे ३ प्रतिशतले मात्र शेयर पाउने अवस्था देखिएको छ । प्राथमिक बजारमा बढेको यस्तो उच्च आकर्षणले नयाँ लगानीकर्ताले लामो सयमसम्म आईपीओ प्राप्त गर्न नसक्ने देखिन्छ । 

कम्पनीले भदौ ९ गते देखि १३ गतेसम्म प्रतिकित्ता १०० अंकित दरमा ८ करोड रुपैयाँ बराबरको ८ लाख कित्ता आईपीओ निष्काशनमा ल्याएको थियो । कर्मचारी र सामूहिक लगानी कोषलाई छुट्याएर ७ लाख ४४ हजार कित्ता शेयर खरीदका लागि सर्वसाधारणबाट माग भएको थियो ।

कम्पनीले यसअघि पहिलो चरणमा आयोजना प्रभावित स्थानीय बासिन्दालाई ४ लाख कित्ता शेयर निष्कासन गरी बाँडफाँड गरिसकेको छ ।

तेह्रथुममा सञ्चालित ७।५ मेगावाटको माथिल्लो खोरुङ्गा खोला जलविद्युत आयोजना निमार्ण गरेको छ । कम्पनीले तेह्रथुम जिल्लामा नै अर्को २ मेगावाटको आयोजना निर्माणको लागि सर्वेक्षण अनुमतिपत्र पाएको छ ।

कम्पनीको अधिकृत पूँजी ४० करोड, जारी पूँजी ४० करोड र चुक्ता पूँजी २८ करोड रहेको छ । आईपिओ बाँडफाँडपछि कम्पनीको चुक्ता पूँजी ४० करोड पुगेको छ ।

कसरी हेर्ने रिजल्ट ?

आईपीओ बाँडफाँडको काम सम्पन्न भईसकेको भएपनि डाटा अपलोड गर्न केही समय लाग्ने भएकाले आईपीओको नतिजा हेर्न भने केही समय कुर्नुपर्ने हुन्छ ।

रिजल्ट सार्वजनिक भएपछि कम्पनीकाे आईपीओको नजिता ४ तरिकाबाट हेर्न सकिन्छ । सिडिएस एण्ड क्लियरिङ लिमिटेडले सञ्चालनमा ल्याएकाे (https://iporesult.cdsc.com.np/) नामक वेभसाइटबाट, एनआईबिएल एस क्यापिटल लिमिटेडकाे वेभसाइट (https://niblcapital.com/), तेह्रथुम पावर कम्पनीकाे वेभसाइट (https://terhathumpc.com/) र  मेराे सेयरमा गई आफुले आईपीओमा आवेदन गर्दाको एप्लिकेसन रिपोर्टमा गएर त्यहाँबाट हेर्न सकिन्छ ।