२०८२ मंसिर १४ गते आइतवार
२०८२ मंसिर १४ गते आइतवार
काठमाडौँ । सर्वोच्च अदालतले नेपालमा प्लाष्टिक झोलाको उत्पादन, आयात, विक्री, वितरण र प्रयोगमा तत्काल पूर्ण प्रतिबन्ध लगाउन सरकारलाई आदेश दिएको छ।
सरकारले आर्थिक वर्ष २०७८र०७९का लागि तयार पारेको बजेट वक्तव्यको बुँदा नं. १६० मा ४० माइक्रोन भन्दा पातलो प्लाष्टिक झोला प्रयोगमा पूर्ण प्रतिबन्ध लगाउने बताइए पनि कार्यान्वयन नभएको भन्दै सर्वोच्चले उक्त प्रावधान तत्काल लागू गर्न सरकारलाई आदेश दिएको हो।
वातावरण कानुन समाज नेपालको तर्फबाट अधिवक्ता पदमबहादुर श्रेष्ठले दर्ता गरेको रिटमाथि फैसला सुनाउँदै सर्वोच्चले २१ दिनभित्र उक्त प्रावधानको कार्यान्वयन गर्न आदेश दिएको छ।
न्यायाधीश नहकुल सुवेदीको एकल इजलासले प्रधानमन्त्री तथा मन्त्रिपरिषद्को कार्यालय, वन तथा वातावरण मन्त्रालय, वातावरण विभाग, उद्योग, वाणिज्य तथा आपूर्ति मन्त्रालय, स्वास्थ्य तथा जनसंख्या मन्त्रालय, संघीय मामिला तथा सामान्य प्रशासन मन्त्रालयलाई बजेट वक्तव्यमा उल्लेखित प्रावधान तत्काल कार्यान्वयन गर्न आदेश दिएको हो।
यसका साथै सर्वोच्चले कार्ययोजनाको प्रभावकारी कार्यान्वयनका लागि मुख्य सचिवको संयोजनमा वन तथा वातावरण, उद्योग, वाणिज्य तथा आपूर्ति, स्वास्थ्य तथा जनसंख्या, संघीय मामिला तथा सामान्य प्रशासन मन्त्रालयका सचिवहरूलाई उक्त कार्ययोजना कार्यान्वयन भए नभएको अनुगमन गर्न आदेश दिएको छ।
सर्वोच्चद्वारा जारी आदेशमा भनिएको छ, ‘उल्लिखित संयन्त्रले कार्ययोजना कार्यान्वयनको प्रगति विवरण सहितको प्रतिवेदन प्रत्येक दुई महिनामा यस अदालतमा पेश गर्ने र यस अदालतको मुद्दा महाशाखाले उक्त प्रतिवेदन आवश्यक निकासाको लागि इजलासमक्ष पेश गर्ने व्यवस्था मिलाउने।’
© 2025 All right reserved to khabarcnter.com | Site By : Sobij
