नेप्सेमा ८.८१ अंकको वृद्धि

श्रावण २८, २०८३ बिहिवार

491

काठमाडौं । साताको चौथो कारोबारको दिन बिहिबार नेप्से परिसूचक ८.८१ अंकले बढेर २,६५१ को विन्दुमा कायम भएको छ ।

आज १७१ कम्पनीको शेयर मूल्य बढेको छ भने ८६ कम्पनीको शेयर मूल्य घटेको छ । आज दिनभरिमा ३४७ कम्पनीको १ करोड २ लाख २५ हजार कित्ता शेयर किनबेच हुँदा ३ अर्ब ७२ करोड माथिको शेयर कारोबार भएको छ ।

सबै समूहगत सूचकको उतारचढाव १ प्रतिशतभन्दा कम रह्यो । बैंकिङ ०.३९, विकास बैंक ०.५३, फाइनान्स ०.०१, होटल तथा पर्यटन ०.३५, जलविद्युत् ०.५६, जीवन बीमा ०.२०, उत्पादन तथा प्रशोधन ०.५७, माइक्रोफाइनान्स ०.२२, निर्जीवन बीमा ०.५२ तथा अन्य ०.२८ प्रतिशत बढेको । लगानी समूह ०.४९ प्रतिशत घटेको छ ।

समूहगत कारोबार हेर्दा हाइड्रोपावर समूहको सबैभन्दा धेरै २ अर्ब १३ करोडको कारोबार भयो । त्यस्तै वाणिज्य बैंकहरुको ३३ करोड, उत्पादन तथा प्रशोधन २० करोड, लगानी २२ करोड रुपैयाँ बराबरको कारोबार भयो ।

हालै सूचीकृत सर्वोत्तम पेन्ट्स् र माउन्ट एभरेस्ट पावरको मूल्य १५ प्रतिशत बढेको । सुपर खुदी हाइड्रोपावरको १३.०२, घलेम्दी हाइड्रोको ११.९०, सीवाईसी लघुवित्तको ५.०९, पाल्पा सिमेन्टको ४.४८ प्रतिशत मूल्य बढेको । इमर्जिङ नेपालको मूल्य ५.११, सिर्जनशील लघुवित्तको ४.५३, अपर लोहोरेखोलाको ३.२९ प्रतिशत मूल्य घटेको छ ।

आज सबैभन्दा धेरै घलेम्दी हाइड्रोको शेयर कारोबार भएको छ । आज यस कम्पनीको २९ करोड ९८ लाख रुपैयाँको शेयर कारोबार भएको छ । एनआरएनको १६ करोड ६९ लाख रुपैयाँको शेयर कारोबार भएको छ । सोलु हाइड्रोको १५ करोड ७० लाख रुपैयाँको शेयर कारोबार भएको छ ।