२०८३ श्रावण २८ गते बिहिवार
२०८३ श्रावण २८ गते बिहिवार
.gif)
काठमाडौं । दुवै हात नभएकी अमेरिकी महिला जेसिका कक्सले आफ्नो अदम्य साहस र इच्छाशक्तिका बलमा संसारलाई चकित पारेकी छन्। उनले खुट्टाको सहायताले विमान चलाएर असम्भव ठानिएको कामलाई सम्भव बनाएकी हुन्।
सन् १९८३ मा अमेरिकाको एरिजोनामा जन्मिएकी जेसिका जन्मिँदै दुवै हातविहीन थिइन्। उनको जन्मपछि परिवार र आफन्तहरू चिन्तित बने पनि उनका आमाबुबाले उनलाई कहिल्यै कमजोर महसुस हुन दिएनन्। उनीहरूले जेसिकालाई आत्मनिर्भर बन्न प्रेरित गरे। सानैदेखि जेसिकाले आफ्ना खुट्टालाई नै हातको रूपमा प्रयोग गर्न सिकिन्। उनले खुट्टाले लेख्ने, खाना खाने, दाँत माझ्ने, कपाल कोर्ने, कम्प्युटर चलाउनेदेखि मोबाइल प्रयोग गर्नेसम्मका काम अभ्यास गर्दै गइन्।
कठिनाइका बाबजुद उनले आत्मविश्वास गुमाइनन्। उनले तेक्वान्दो सिकेर ब्ल्याक बेल्टसमेत हासिल गरिन्। त्यसपछि उनको लक्ष्य बन्यो-विमान उडाउने। धेरैले उनको सपना असम्भव भएको बताए पनि जेसिकाले हार मानिनन्। लामो अभ्यासपछि उनले खुट्टाको प्रयोग गरेर विमानका नियन्त्रण प्रणाली सञ्चालन गर्ने सीप हासिल गरिन्।
सन् २००८ मा उनले इतिहास रच्दै दुवै हात नभई विमान उडाउने र पाइलट लाइसेन्स प्राप्त गर्ने विश्वकै पहिलो व्यक्ति बन्न सफल भइन्। जेसिकाको यो उपलब्धिले विश्वभरका लाखौँ मानिसलाई प्रेरणा दिएको छ। अहिले उनी पाइलटका साथै प्रेरणादायी वक्ता र लेखिकाका रूपमा परिचित छन्। उनले विभिन्न देशमा पुगेर आफ्नो जीवनकथा सुनाउँदै मानिसलाई आत्मविश्वास र संघर्षको महत्व बुझाउँदै आएकी छन्।
जेसिका कक्सको जीवनले एउटा सन्देश दिन्छ-सफलताका लागि शरीरको कुनै कमी होइन, आत्मविश्वास, मेहनत र दृढ इच्छाशक्ति महत्वपूर्ण हुन्छ। कठिन परिस्थितिलाई चुनौती दिँदै अघि बढ्ने हो भने असम्भव देखिने सपना पनि पूरा गर्न सकिन्छ भन्ने उदाहरण उनी बनेकी छन्।
© 2026 All right reserved to khabarcnter.com | Site By : Sobij
