२०८३ श्रावण २८ गते बिहिवार
२०८३ श्रावण २८ गते बिहिवार
.gif)
काठमाडौं । नेपाली कांग्रेसका नेता डा.शेखर कोइरालाले पार्टी अहिले निरङ्कुशता र हुकुमी शासन शैलीमा चलिरहेको आरोप लगाएका छन् ।
बीपी कोइरालाको ४४औँ स्मृति दिवसका अवसरमा काठमाडौंस्थित प्रज्ञा प्रतिष्ठानमा आयोजित कार्यक्रममा बोल्दै कोइरालाले कांग्रेसभित्र पछिल्लो समय लोकतान्त्रिक मूल्य र मान्यता कमजोर बन्दै गएको बताएका हुन् ।
‘कांग्रेस कमजोर बन्दा देश अराजकतातिर जान्छ,’ उनले भने, ‘नेपाली कांग्रेसको जन्म निरंकुशताको अन्त्यका लागि भएको हो । तर अहिले नेपाली कांग्रेस नै हुकुमी शैलीमा चलेको महसुस भइरहेको छ।’
कोइरालाले वर्तमान सभापति गगन थापा पक्षलाई बीपी कोइरालाको विचार स्मरण गर्दै व्यक्तिवाद र स्वार्थीपन त्याग्न आग्रह गरेका छन् । उनले पार्टीभित्र निर्णय प्रक्रिया लोकतान्त्रिक हुनुपर्नेमा जोड दिएका छन् ।
उनले वडा अध्यक्षहरूलाई बिना स्पष्टीकरण सदस्यता अद्यावधिक नगरेको भन्दै हटाइएको विषय स्वीकार्य नहुने बताएका छन् । पार्टीको एकता कायम राख्न सभापति गगन थापाले अग्रसरता लिनुपर्ने उनको भनाइ थियो ।
कोइरालाले कांग्रेसलाई बलियो बनाउन सबै पक्षबीच संवाद र सहकार्य आवश्यक रहेको समेत बताएका छन् ।
© 2026 All right reserved to khabarcnter.com | Site By : Sobij
