२०८३ श्रावण २८ गते बिहिवार
२०८३ श्रावण २८ गते बिहिवार
.gif)
काठमाडौं । नेपाली कांग्रेसले १५औँ महाधिवेशनको तयारीका लागि क्रियाशील सदस्यता अद्यावधिक गर्ने कार्यलाई तीव्रता दिएको छ ।
सोमबार ललितपुरको सानेपास्थित पार्टी केन्द्रीय कार्यालयमा बसेको सदस्यता व्यवस्थापन केन्द्रीय समितिको बैठकले सदस्यता वितरण र नवीकरणको प्रक्रियालाई सहज तथा द्रुत बनाउन सातै प्रदेशमा केन्द्रीय पदाधिकारी तथा सदस्यहरूलाई विशेष जिम्मेवारी सुम्पेको छ ।
महामन्त्री एवं समितिका संयोजक प्रदीप पौडेलको अध्यक्षता र महामन्त्री गगनकुमार थापाको उपस्थितिमा बसेको बैठकले कोशी प्रदेशमा डा। डिला संग्रौला, मधेशमा देवराज चालिसे, बागमतीमा बहादुर सिंह लामा र गण्डकीमा मुक्ताकुमारी यादवलाई अनुगमनको जिम्मेवारी तोकेको छ । त्यसैगरी, लुम्बिनी प्रदेशको कमाण्ड अमरसिंह पुन, कर्णालीको जानकी सिंह र सुदूरपश्चिम प्रदेशको जिम्मेवारी उदय शमशेर राणालाई दिइएको छ ।
तोकिएका प्रतिनिधिहरूले प्रदेशका सबै संगठनात्मक संरचनाहरूको प्रयोग गरी सदस्यता अद्यावधिक कार्यको प्रभावकारी अनुगमन गर्नेछन् । बैठकले नयाँ क्रियाशील सदस्यता वितरण तथा नवीकरण गरी केन्द्रीय प्रणालीमा प्रविष्ट गरिसक्नुपर्ने अन्तिम समयसीमा जेठ २१ गतेसम्मका लागि तय गरेको छ ।
१४औँ महाधिवेशनका क्रममा छानबिन समितिले आधिकारिकता दिएका सदस्यहरूलाई पुरानो सदस्यता मानेर नवीकरण प्रक्रियामा सामेल गराउन जिल्ला सभापतिहरूलाई परिपत्र गर्ने निर्णयसमेत भएको छ । यस्तै, विभिन्न राजनीतिक दल त्याग गरी नेपाली कांग्रेसमा समायोजन भएका व्यक्तिहरूको सदस्यता सम्बन्धमा देखिएका समस्या समाधान गर्न १३ वटा जिल्लामा केन्द्रीय प्रतिनिधि खटाइएको छ ।
© 2026 All right reserved to khabarcnter.com | Site By : Sobij
