गोपाल किरातीले 'खाओवादी’ भनेपछि विप्लवले भनेः आन्द्रा–भुँडी मात्र होइन, तपाईँको पित्त थैलीसम्म थाहा छ

मंसिर ५, २०८२ शुक्रवार

309

गोपाल किरातीले 'खाओवादी’ भनेपछि विप्लवले भनेः आन्द्रा–भुँडी मात्र होइन, तपाईँको पित्त थैलीसम्म थाहा छ

काठमाडौं । पुष्पकमल दाहाल प्रचण्ड नेतृत्वको नेकपा माओवादी केन्द्रमा फर्किएका नेता गोपाल किराती नेत्रविक्रम चन्द विप्लवमाथि आक्रमक बनेका छन्।

कुनै समय पार्टी छाड्दा प्रचण्डलाई नै ‘डाका’ भनेका किराती गत कात्तिक १९ मा प्रचण्डले नयाँ पार्टी घोषणा गरेपछि उनी त्यही पार्टीमा मिसिएका थिए। सहमति पत्रमा हस्ताक्षर गर्दा किरातीले समाजवादी क्रान्ति सफल बनाउने र भ्रष्टाचारविरुद्ध कडा कदम चाल्ने बताएका थिए।

तत्कालीन जनयुद्धकालीन नेकपा (माओवादी)को मान्यता पाएको विप्लव समूहलाई निर्वाचन आयोगले केही दिनअघि ‘गुलाफ’ चुनाव चिह्न दिएको थियो। त्यही समूहका नेता विप्लवले प्रधानमन्त्री सुशीला कार्कीलाई भेटेको तस्वीर सार्वजनिक भएपछि किरातीले सामाजिक सञ्जालमा विप्लव समूहलाई ‘खाओवादी’को संज्ञा दिएका छन्।

'विप्लवजीको माओवादी वस्तुतः खाओवादी हो। आन्द्रा–भुँडी जम्मै थाहा छ, फुर्ति लइरहनु पर्दैनु, उनले भनेका छन्, ‘प्रथम् संविधानसभाबाट प्रगतिशील संविधान बन्ने वातावरण भाँडेको अपराधबाट तिनले कहिल्यै माफी पाउने छैनन्।’

किरातीको यस टिप्पणीपछि विप्लव नेतृत्वको नेकपा माओवादीका पोलिटब्युरो सदस्य देवान किरातले कडा प्रतिक्रिया दिएका छन्। उनले फेसबुकमा किरातीलाई मेन्सन गर्दै राजनीतिक स्तर नै तल झरेको आरोप लगाए।

'विचार र राजनीति फरक भए पनि गोपाल किरातीलाई म सम्मान गर्दै आएको थिएँ। तर उहाँको पछिल्लो स्टाटसले राजनीतिक बुझाइ निकै तल झरेको देखायोु, उनले भने, खाओवादी को हो भनेर १, २, ३ गर्नुपर्ने अवस्था छैन। आन्द्रा–भुँडी मात्र होइन, तपाईँको पित्त थैलीसम्म थाहा छ हामीलाई। प्रिय बन्नु छ भने किन हैसियत बिर्सेर यति तल झर्नु हुन्छ ? नझर्नुस् भन्ने सुझाव बाहेक अरू केही छैन।'