२०८२ आश्विन २६ गते आइतवार
२०८२ आश्विन २६ गते आइतवार
काठमाडौं । च्यासलको पार्टी कार्यालय भदौ २३ र २४ को आन्दोलनका क्रममा आगजनी भएर काम नलाग्ने भएपछि नेकपा एमालेले केन्द्रीय कार्यालय राख्ने भवन खोज्न सुरु गरेको छ ।
आन्दोलनकारीले कार्यालयमा आगजनी र तोडफोड गरेर ध्वस्त भएकाले बैठक बस्न र पार्टीका अन्य गतिविधि समेत सञ्चालन गर्न मिल्ने अवस्था नभएकाले नयाँ भवनको खोजी गर्नुपरेको एमाले केन्द्रीय कार्यालयका सचिव डा। भिष्म अधिकारीले जानकारी दिए ।
आन्दोलनकारीले केन्द्रीय कार्यालयसहित प्रदेश तथा जिल्ला पार्टी कार्यालय समेत आगजनी र तोडफोड भएको एमालेले जनाएको छ । एमाले नेताहरुका अनुसार नेता कार्यकर्ताहरूले काठमाडौं र ललितपुरमा केही भवनहरू कार्यालयका लागि हेरे पनि टुङ्गो लागिसकेको छैन ।
उनीहरूका अनुसार केही दिनमै महासचिव शंकर पोखरेल नेतृत्वको केन्द्रीय कार्यालयको बैठक बसेर निर्णय गर्ने तयारी छ । त्यस्तै एमालेले आन्दोलनका क्रममा केन्द्रीय नेताहरूको घर र अन्य क्षतिको विवरणसमेत सार्वजनिक गर्ने तयारी गरेको छ । विवरणहरू संकलन भइरहेकाले केही दिनमै क्षतिबारे जानकारी गराउने कार्यालय सचिव अधिकारीले जानकारी दिए ।
‘प्रदेश–प्रदेशमा क्षतिको विवरण संकलन गरेर पठाउन भनिएको छ । केन्द्रको हकमा पनि विवरण संकलन गर्ने काम भइरहेको छ’, अधिकारीले भने,‘कार्यालयको बैठक बसेपछि क्षतिको विवरण पनि सार्वजनिक हुनेछ ।’
© 2025 All right reserved to khabarcnter.com | Site By : Sobij
