२०८२ भाद्र २० गते शुक्रवार
२०८२ भाद्र २० गते शुक्रवार
काठमाडौं । नेकपा एमालेको महाधिवेशनको समय लम्बिएको छ । पूर्व निर्धारित कार्यक्रमअनुसार शुक्रबार पहिलो दिन ५ बजेसम्म उद्घाटनसहित सबै प्रतिवेदन र प्रस्तावहरू पेस गरिसक्ने भनिएपनि ५ बजेसम्म २ वटा प्रतिवेदन मात्र पेस भएका छन् ।
प्रचार विभाग प्रमुख राजेन्द्र गौतमका अनुसार पाँच बजेसम्म अध्यक्ष केपी शर्मा ओलीको राजनीतिक प्रतिवेदन र महासचिव शंकर पोखरेलको सांगठानिक प्रस्ताव बन्दसत्रमा पेस भएको छ ।
त्यसपछि उपाध्यक्ष विष्णु पौडेलको विधान संशोधनसम्बन्धी प्रस्ताव पेस हुनेछ । मूल तीन वटा प्रस्ताव र प्रतिवेदन पेस भएपछि विभिन्न आयोगहरूका प्रतिवेदन पेस हुनेछन् । ‘यी प्रतिवेदन पेस भएपछि आठ बजेतिरमात्रै पहिलो दिनको महाधिवेशन सकिने छ’, गौतमको भनाइ छ ।
प्रचार विभाग प्रमुख गौतमले अध्यक्षको प्रतिवेदनमा सिङ्गो कम्युनिस्ट आन्दोलनको समीक्षा गरिएको भन्दै नेपाली विशेषतासहितको समाजवादका कार्यक्रम र निर्वाचनमा प्राप्त जनमत, पार्टीको सिद्धान्तबारे उल्लेख गरेको बताए ।
उनले अध्यक्षको प्रतिवेदनमा मिसन ८४ लाई केन्द्रमा राखेर बहुमत ल्याउने, सुदृढ र एकताबद्ध पार्टी निर्माण गर्ने, समृद्ध नेपाल सुखी नेपाली राष्ट्रिय गन्तव्यको व्याख्या, पार्टी निर्माण र देश निर्माणबारे उल्लेख गरिएको बताए ।
यसका साथै राजनीतिक शक्तिहरूको चर्चा, भूराजनीतिक विषयको विश्लेषणसहिसत समाजवाद प्राप्त गर्ने रोडम्याप अध्यक्षको प्रस्तावमा समेटिएको बताए ।
विधान महाधिवेशनमा दोस्रो दिन शनिबार प्रस्तुत प्रतिवेदनहरूमाथि समूहगत छलफल गरेर निष्कर्ष सुनाउने र आइतबार लेखा आयोगको निर्वाचनसहित महाधिवेशन समापन गर्ने कार्यतालिका रहेको छ ।
© 2025 All right reserved to khabarcnter.com | Site By : Sobij
