२०८२ भाद्र १६ गते सोमवार
२०८२ भाद्र १६ गते सोमवार
काठमाडौं । काठमाडौं उपत्यका आसपासका जिल्लाहरूबाट मानिसहरूलाई ‘काम मिलाइदिन्छौँ’ भन्दै भारत लगेर मिर्गौला तस्करी गर्ने समूहको मुख्य नाइकेसहित ७ जना पक्राउ परेका छन् ।
साउन २० मा प्रहरीको मानव बेचबिखन ब्युरोले राकेश नेपाली, समीर नेपाली र राजकुमार नेपालीलाई पक्राउ गरेको थियो । उनीहरूको बयानको आधारमा मुख्य नाइके सिन्धुपाल्चोकको सुनकोशी गाउँपालिका–२ घर भएका ३८ वर्षीय श्यामकृष्ण भण्डारी भारतबाट पक्राउ परेका हुन् ।
भण्डारीका सहयोगी सिन्धुपाल्चोकको इन्द्रावती गाउँपालिका–२ घर भएका २९ वर्षीय सुजन भारती पनि पक्राउ परेका छन् । भण्डारी र भारती नयाँ दिल्ली स्थित लाजपत नगरमा बस्दै आएका थिए ।
भारतमा बस्नेहरूलाई उपत्यका आसपासका जिल्लाहरू काभ्रे, सिन्धुपाल्चोक, सिन्धुली, नुवाकोट र धादिङबाट मिर्गौला दाता सङ्कलन गरेर लैजाने थप दुई जना आइतबार काठमाडौँबाट पक्राउ परेका छन् । सविन पन्त र राजकुमार तामाङलाई काठमाडौँबाट पक्राउ गरिएको मानव बेचबिखन ब्युरोका एसएसपी कृष्ण पङ्गेनीले बताए ।
आरोपीहरू विरुद्ध ५ जना पीडितहरूले प्रहरीकहाँ जाहेरी दिएका छन् । ७ जनाविरुद्ध ४ वटा छुट्टाछुट्टै मुद्दा दर्ता गरेर अनुसन्धान भइरहेको एसएसपी पङ्गेनीले पत्रकार सम्मेलन गरेर जानकारी दिए । उनले भने, ‘यो संगठित गिरोह रहेछ ।’
पाँचजना आरोपीहरूले पीडितहरूलाई भारतको नयाँ दिल्लीमा लगेर श्यामकृष्ण भण्डारीसँग भेट गराउँथे । दिल्लीको लाजपत नगरमा सुजन भारती पनि भण्डारीसँगै बस्थे ।
गाउँमा गएर ग्राहक खोज्दा आरोपीहरूले ६ लाखसम्मको प्रलोभन दिने गरेका थिए । तर, पीडितहरू कसैले पनि रकम पाएनन् । एसएसपी पङ्गेनी भन्छन्, ‘केही पीडितलाई काम मिलाइदिन्छौँ भनेर भारत लगेर मिर्गौला निकालेको देखिन्छ ।’
नयाँ दिल्लीमा लगेपछि निजी अस्पताल र क्लिनिकमा लगेर पीडितहरूलाई आँखामा पट्टि बाँधेर ३–४ दिनसम्म राखेर मिर्गौला निकाल्ने गरेको प्रहरीको अनुसन्धान निष्कर्ष छ । मिर्गौला निकालेपछि गिरोहका सदस्यहरूले पीडितहरूलाई पैसा दिँदैनथे । अहिलेसम्म एक जना पीडितले जम्मा ५ हजार लिएको प्रहरीसँग बताएका छन् ।
© 2025 All right reserved to khabarcnter.com | Site By : Sobij
