२०८२ भाद्र १६ गते सोमवार
२०८२ भाद्र १६ गते सोमवार
काठमाडौं । नर्वेको ट्रम्सो सहर आफ्नो अनौठो दिन तथा रातको चक्रका कारणले गर्दा संसारभर चर्चित छ । सो सहरमा जाडो याममा महिनौंसम्म सूर्य देखिंदैन । जबकि गर्मी याममा भने हप्तौंसम्म सूर्य अस्ताउँदैन ।
सोही कारणले गर्दा यो सहरलाई उत्तरी ध्रुव (आर्कटिक) को पेरिस वा मध्यरातमा सूर्य उदाउने सहरको नामले चिनिन्छ । नोभेम्बरदेखि जनवरी महिनासम्म ट्रम्सो सहरमा सूर्य नै उदाउँदैन । जसका कारण सहरभर अन्धार छाएको हुन्छ । मानिसहरुले त्यस समयमा घडी तथा आफ्नो बानीको हिसाबले दिन तथा रातको अनुमान गरी जिवन चलाउँछन् ।
त्यसैगरी मे महिनादेखि जुलाई महिनासम्म भने त्यहाँ सूर्य नै अस्ताउँदैन । मध्यरातको समयमा समेत आकास निलो तथा चम्किलो देखिन्छ । त्यो दृश्य हेर्नका लागि हरेक वर्ष ठूलो संख्यामा पर्यटकहरु त्यहाँ पुग्दछन् ।
जाडो याममा उक्त सहरको आकाशमा गुलाबी रङको प्रकाशले रङ्गीन भएको हुन्छ । त्यसलाई उत्तरी प्रकाश अर्थात् अरोरा भनिन्छ । त्यस्तो नर्दन लाइट्सको दृश्यावलोकनका लागि ट्रम्सो सहर विश्वप्रसिद्ध छ ।
महिनौंसम्म अँध्यारो व्याप्त हुने उक्त सहरमा जिउनका लागि मानिहरु कृत्रिम प्रकाश तथा भिटामिन डीको सेवनमा निर्भर रहन्छन् । त्यसैगरी हप्तौंसम्म रहने उज्यालोको समयमा मानिसहरुलाई निद्रा पूरा गर्नै सकस पर्दछ । किनकि यत्रतत्र २४ सै घण्टा उज्यालो हुन्छ ।
तर, ट्रम्सोबासीहरुले उक्त अनौठो अनुभवहरुलाई पर्वहरुसँगै मनाउँछन् । त्यहाँ हुने पोलर नाइट फेस्टिबल र मिटनाइट सन म्याराथन निकै चर्चित छन् ।
त्यहाँ आर्कटिक विश्वविद्यालय पनि रहेको छ, जसले ध्रुवीय क्षेत्र तथा जलवायुका विषयमा अनुसनधान गर्दछ । वैज्ञानिकहरुका लागि ट्रम्सो सहर वास्तवमा कुनै प्रयोगशाला भन्दा कम छैन ।
हिउँले भरिने यो सहरमा ह्वेलमाछा हेर्ने, कुकुर दौड तथा स्किइङ्ग जस्ता गतिविधिहरु पर्यटकको रोजाइमा पर्दछन् । साथै यहाँको प्राकृतिक सुन्दरता तथा छटा पनि निकै विशेष छ ।
वैज्ञानिकहरुका अनुसार ध्रुवीय क्षेत्रमा रहेको यो सहरमा गर्मी याममा हप्तौँसम्म सूर्य नअस्ताउने र जाडो याममा महिनौंसम्म सूर्य नै नउदाउनुको कारण पृथ्वीको झुकाव हो । वास्तवमा पृथ्वी आफ्नो अक्षमा २३.५ डिग्रीले झुकेको हुन्छ । सोही कारणले ध्रुवीय क्षेत्रमा कुनैबेला सूर्य अस्ताइरहन्छ त कुनैबेला उदाइरहन्छ ।
© 2025 All right reserved to khabarcnter.com | Site By : Sobij
