२०८२ भाद्र १३ गते शुक्रवार
२०८२ भाद्र १३ गते शुक्रवार
काठमाडौं । विदेशमा रहेका पतिको निधनको खबर सुनेपछि धनकुटामा एकजना महिलाले पनि निधन भएको छ।
वैदेशिक रोजगारीको सिलसिलामा दुई वर्षदेखि कुवेतमा रहेका महालक्ष्मी नगरपालिका-१ कटहरेका ४३ वर्षीय डम्बर मगरको निधनको खबर सुनेपछि उनकी पत्नी विद्याको पनि निधन भएको हो । परिवारको जीविकोपार्जनका लागि गतिलो कमाइ गरेर फर्किने गरी कुवेत गएका उनी केही दिनअघि उतै बिते ।
डम्बरबहादुरको अचानक निधन भएको खबर आएपछि पत्नी विद्यालाई झट्का लाग्यो। पतिको फोनको प्रतीक्षामा रहेकी ३३ वर्षीया विद्या आफ्नो जीवन साथी बितेको खबरले स्तब्ध भइन् । पति कुवेतमा बितेको पाँच दिनपछि विद्याको पनि निधन भएको छ।
घरमा पत्नी, २, १६ र १७ वर्षीया तीन छोरी पनि थिए । आमा र बुवाको पाँच दिनको फरकमा निधनपछि तीन छोरी १७ वर्षीय विपना, १६ वर्षीय सञ्जु र २ वर्षीय संयुक्ताको विचल्ली भएको छ।
वडाध्यक्ष टेकबहादुर गुरुङले डम्बरबहादुरको निधन विषाक्त मदिरा पिउँदा भएको खबर आए पनि खास कारण पुष्टि हुन नसकेको बताएका छन् ।
दुवै जनाको निधनका कारण गाउँ नै शोकमग्न भएको गुरूङले बताए । ‘श्रीमानको मृत्युको खबर सुनेपछि श्रीमतीको पनि दुखद निधन भयो,’ उनले भने, ‘पति वियोगको पीडामा रहेकी पत्नीको पनि मृत्यु भएपछि छोरीहरूको बिचल्ली भएको छ।’
अचानक आमाबाबु गुमाएका छोरीहरूको पठनपाठनसहित दैनिक जीवन सहज बनाउन पहल भइरहेको वडाध्यक्ष गुरुङले बताए ।
© 2025 All right reserved to khabarcnter.com | Site By : Sobij
