२०८२ भाद्र १३ गते शुक्रवार
२०८२ भाद्र १३ गते शुक्रवार
टोकियो । केन्द्रीय जापानको आइची प्रान्तस्थित टोयोआके नगरपालिकाले आफ्ना ६९ हजार बासिन्दालाई दैनिक दुई घण्टाभन्दा बढी स्मार्टफोन प्रयोग नगर्न आग्रह गर्ने प्रस्ताव अघि सारेको छ। यसलाई जापानमै पहिलोपटक आएको यस्तो प्रकारको पहल मानिएको छ।
नगर प्रमुख मसाफुमी कोकीले सोमबार सार्वजनिक गरेको प्रस्ताव हाल नगर सभामा छलफल भइरहेको छ। यस नियमलाई आउँदो अक्टोबरमा पारित गर्ने तयारी छ, तर यसलाई कडाइका साथ लागू गर्ने भने छैन।
‘यो दुई घण्टाको सीमा केवल एक मार्गनिर्देशन मात्र हो,’ मेयर कोकीले भने, ‘यसको उद्देश्य नागरिकलाई सचेत गराउँदै परिवारभित्र मोबाइल प्रयोगबारे छलफल गर्ने अवसर प्रदान गर्नु हो।’
प्रस्ताव अनुसार अध्ययन, कामकाज, अनलाइन सिकाइ, व्यायाम वा ई–स्पोर्ट्स प्रतियोगिताको तयारी जस्ता गैर–मनोरञ्जनात्मक गतिविधिमा गरिएको स्मार्टफोन प्रयोगलाई दुई घण्टाको सीमा भित्र गणना गरिने छैन।
मेयरले स्मार्टफोनलाई दैनिक जीवनमा "अत्यावश्यक र उपयोगी" माने पनि उनले यसले धेरै समस्या निम्त्याएको उल्लेख गरे। उनका अनुसार केही विद्यार्थीहरू मोबाइल बिना घरबाट निस्कन अस्वीकार गर्दै विद्यालय नै जान छोडेका छन् भने वयस्कहरूले पनि फोन र ट्याब्लेट स्क्रोल गर्ने क्रममा निद्रा वा परिवारसँगको समय खेर फालिरहेका छन्। यदि यो प्रस्ताव पारित भए पनि यसमा कुनै जरिवाना वा कानुनी कारबाही नहुने स्पष्ट गरिएको छ।
© 2025 All right reserved to khabarcnter.com | Site By : Sobij
