२०८२ कार्तिक ३ गते सोमवार
२०८२ कार्तिक ३ गते सोमवार
काठमाडौं । श्रीमतीलाई १४ पटक चक्कु प्रहार गरेर हत्या प्रयास गर्दा पनि उनी बाँचेपछि एक व्यक्तिले फेरि एक पटक क्रूर र डरलाग्दो घटना दोहोर्याएका छन् ।
दुई वर्ष जेल बसेर छुटेका एक पतिले श्रीमतीको बाटो छेकेर रेल्वे ट्र्याक नजिकैको झाडीमा लगी दाँतले नाक टोकेर शरीरबाट अलग गरिदिएका छन् । प्रहरीले पीडित महिलालाई जिल्ला अस्पतालमा भर्ना गरेको छ। घटनापछि फरार श्रीमानको खोजीमा प्रहरीले छापा मार्न सुरु गरेको छ ।
भारतको कन्नौज सहरको काजी टोला मोहल्ला निवासी पप्पु दोहरेले करिब दुई वर्षअघि माइत जान जिद्दी गरेकी श्रीमती गुड्डी देवीलाई बस स्टेसनमा टाउको र पेटमा १४ पटक चक्कु प्रहार गरी गम्भीर घाइते बनाएका थिए । दुई महिनाको अस्पताल बसाइपछि गुड्डी देवीको ज्यान बचेको थियो । प्रहरीले पप्पुलाई श्रीमतीमाथि ज्यान मार्ने उद्योग गरेको आरोपमा जेल पठाएको थियो ।
उनी हालसालै करिब १५ दिनअघि मात्र धरौटीमा जेलबाट छुटेका थिए । घर फर्केपछि उनले श्रीमती रंगियनपुर्वा गाउँस्थित माइती बस्दै आएको थाहा पाए । सोमबार बिहान श्रीमती सरायमीराको नुरी मार्केटमा मजदुरी गरेर घर फर्किरहेकी थिइन् । सोही क्रममा तिर्वा क्रसिङ नजिकै रेल्वे ट्र्याक पार गर्ने क्रममा पप्पुले गुड्डी देवीलाई बाटो छेके । वरिपरिका मानिसहरूले केही बुझ्नुअघि नै पप्पुले गुड्डीलाई जबरजस्ती झाडीमा लगेर कुटपिट गरे र दाँतले उनको नाक टोकेर शरीरबाट अलग गरिदिए ।
घटनाको जानकारी पाउनासाथ महिला प्रहरी टोली घटनास्थल पुगेर घाइते गुड्डीलाई जिल्ला अस्पतालमा भर्ना गरायो । घटनापछि आरोपित पप्पु फरार भए । सीओ सिटी (भारतीय प्रहरीको एक पद) अभिषेक प्रताप अजेयले घटनाबारे भनेका छन्, आरोपितको खोजी भइरहेको छ । छिट्टै उनलाई पक्राउ गरी जेल पठाइनेछ ।
घाइते महिलाकी आमा राजेन्द्र देवीले ज्वाइँ पप्पु बौलाहा भएको र उसले कुनै पनि वेला छोरीको हत्या गर्न सक्ने बताइन् ।
© 2025 All right reserved to khabarcnter.com | Site By : Sobij
