काठमाडौं । प्रधानमन्त्री केपी शर्मा ओलीले मौजुदा मन्त्रिपरिषदमा हेरफेर गर्ने भएका छन्। प्रधानमन्त्री ओलीले हालका केही मन्त्री हटाएर नयाँ ल्याउने गृहकार्य गरिरहेको उनीनिकट नेताहरूले बताएका छन्।

हाल मन्त्रिपरिषद्मा नेकपा एमाले, नेपाली कांग्रेस, जनता समाजवादी पार्टी (अशोक राई), लोकतान्त्रिक समाजवादी पार्टी र नागरिक उन्मुक्ति पार्टीबाट मन्त्रीहरू सामेल छन्।

घुस डिल प्रकरणमा मुछिएका संघीय मामिला तथा सामान्य प्रशासनमन्त्री राजकुमार गुप्ताले राजीनामा दिएपछि मंगलबार नै २०७४ साल वैशाखमा सम्पन्न स्थानीय तहको चुनावमा तनहुँकै भानु नगरपालिकाको मेयर उठेर पराजित, २०७६ माघ ९ गते राष्ट्रिय सभा सदस्य निर्वाचित भएकी एमालेकी राष्ट्रिय सभा सदस्य भगवती न्यौपानेलाई मन्त्री नियुक्त गरेर सप्राईज दिइसकेका छन् ।

बालुवाटारसँगै निकट रहेका एक नेताले बताएअनुसार जसपाका नवलकिशोर साह सुडीलाई हटाउन लागिएको छ। उनको ठाउँमा पठाउने नामबारे टुंगो लागिसकेको छैन। उक्त पार्टीबाट रञ्जु झा मन्त्री बन्ने कसरतमा छिन्। जसपाले दुई महिना अगाडि नै पार्टीबाट पठाएका दुई जना मन्त्री फेर्न प्रधानमन्त्री ओलीलाई आग्रह गरेको ती नेता बताउँछन्।

‘बुधबार नै पनि केही मन्त्री हेरफेर हुन सक्छन्। प्रधानमन्त्री तयारीमा हुनुहुन्छ,’  ती नेताले भने, ‘सम्भवतः बुधबार ३ बजे भगवती न्यौपानेसँगै थप केही मन्त्रीको शपथ होला।’ न्यौपाने पनि प्रधानमन्त्रीले ओलीले आफूलाई ‘सरप्राइज’ नै दिएको बताउँछिन्। 

ओली प्रधानमन्त्री बनेको मंगलबार एक वर्ष पुगेको छ। तर, मन्त्रिपरिषदमा रहेका केही विवादित बन्दै गएको र केहीको कार्यसम्पादन पनि निकै कमजोर रहेको कारण हेरफेर गर्ने निष्कर्षमा ओली पुगेको ती नेताको भनाइ छ। 

कांग्रेस र एमाले नेतृत्व यस विषयमा छुट्टाछुट्टै परामर्शमा रहेको कांग्रेस सभापति शेरबहादुर देउवानिकट नेताको भनाइ छ। ‘प्रधानमन्त्रीले सरप्राइज दिने गर्नु भएको छ, उहाँले भित्रभित्रै तयारी गरिसक्नुभएको पनि होला,’  ओलीनिकट अर्का नेताले भने।

त्यसो त जसपा नेपालका अध्यक्ष उपेन्द्र यादवसँग पनि कांग्रेस र एमाले नेतृत्वले छलफल गरेको छ। सोमबार राति पनि त्रिपक्षीय छलफल भएको थियो। जसपा नेपाललाई सरकारमा भित्र्याएर राष्ट्रिय सभामा सत्तापक्षको बहुमत पुर्‍याउने र भूमि विधेयक सहज रुपमा पारित गर्ने प्रयास प्रधानमन्त्रीले गरिरहेका छन्। 

त्यसो त वर्ष दिन पुगेको कारण एकाधबाहेक सबै मन्त्रीको सेट नै फेर्नुपर्ने भन्दै कांग्रेस र एमाले दुवै प्रमुख सत्ता साझेदारभित्र नेताहरूको दौडधुप पनि चलिरहेको छ। तर यस विषयमा कांग्रेस सभापति देउवाले प्रधानमन्त्री ओलीलाई हरियो बत्ती देखाइ नसकेको स्रोतको भनाइ छ।