काठमाडौं । काभ्रेको साँगास्थित पतञ्जलि योगपीठको जग्गा बिक्री प्रकरणमा भ्रष्टाचार मुद्दा खेपिरहेका अध्यक्ष माधवकुमार नेपालबारे नेतृ रामकुमार झाँक्री शनिबार तिखो टिप्पणी गरेपछि नेकपा एकीकृत समाजवादीमा खैलाबैला भएको छ ।

रामकुमारीले बुटवलमा आयोजित युवा संघ लुम्बिनी प्रदेशको कार्यक्रममा शनिबार अध्यक्ष माधवकुमार नेपालबारे कडा र तिखो अभिव्यक्ति दिएकी थिइन् ।

रामकुमारीको उक्त उत्तेजक अभिव्यक्तिपछि एकीकृत समाजवादीका महासचिव घनश्याम भुसालले आइतबार परिपत्र नै गरेर अध्यक्ष नेपालविरुद्ध कुनै किसिमको टिप्पणी नगर्न निर्देशन दिएका हुन् ।

भुसालले जारी गरेको उक्त एक पृष्ठको सर्कुलरमा अध्यक्ष नेपालविरुद्ध कुनै पनि किसिमको टिप्पणी नगर्न भनिएको छ । उनले लिखित निर्देशन नै जारी गरेर अध्यक्ष नेपालविरुद्ध नबोल्न कार्यकर्ताहरूलाई आइतबार निर्देशन दिएका हुन् ।

भुसालले उक्त लिखित सर्कुलरमा नेपालविरुद्ध विशेष अदालतमा दायर भ्रष्टाचार मुद्दामा यसअघि नै पार्टीले औपचारिक धारणा ल्याइसकेकाले त्यससँग बाझिने गरि कुनै पनि सार्वजनिक अभिव्यक्ति नदिन भनेका छन् । भुसालले पार्टीको विचारसँग बाझिने गरि सार्वजनिक रूपमा नबोल्न र नलेख्न नेता-कार्यकर्ताहरूलाई लिखित निर्देशन दिएका हुन् ।

‘पार्टी अध्यक्ष कमरेड माधव कुमार नेपालमाथि अख्तियार अनुसन्धान आयोगले विशेष अदालतमा दायर गरेको मुद्दाका सम्बन्धमा जेठ २२ गते विज्ञप्तिमार्फत् पार्टीको प्रारम्भिक धारणा स्पष्ट पारिएको सर्वविदित नै छ । यस परिस्थितिलाई कसरी सामना गर्ने भन्नेबारे अन्य आवश्यक निर्णय पार्टीले संस्थागत रुपमा गर्ने नै छ’, उनले पत्रमा भनेका छन्, ’तसर्थ, पार्टीको आधिकारिक धारणासँग बाझिने कुनै पनि कुरा सार्वजनिक रूपमा नबोल्न, नलेख पार्टी केन्द्रीय कार्यालय सबै कमरेडहरूको ध्यानाकर्षण गर्दछ ।’

महासचिव भुसालले पार्टीमा आफ्ना धारणा राखे विधि र स्थानहरू छन् भन्ने कुरामा हेक्का राख पनि चेतावनी दिएका छन् । ‘कुनै पनि बहानामा सार्वजनिक वाद-प्रतिवादमा नउत्रिनसमेत पार्टी संगठन सबैलाई आग्रह गर्दछ’, उनले भनेका छन् ।

झाँक्रीले शनिबार युवा संघको लुम्बिनी प्रदेश अधिवेशनलाई सम्बोधनका क्रममा अध्यक्ष नेपालविरुद्ध कडा अभिव्यक्ति दिएकी थिइन् । उनले अब अर्ली महाधिवेनमार्फत् नयाँ नेतृत्व ल्याउनुपर्ने पनि बताएकी थिइन् ।

‘म त भन्छु अर्ली महाधिवेशन गरौँ । कानुनी र संवैधानिक हिसाबले अध्यक्षमाथि समस्या आयो’, उनले भनेकी थिइन्, ‘कयौँ पार्टी सदस्यहरूमा पनि समस्या आएकै छ । अब काँधमाथि मरेको सिनो हालेर हिँड्न सकिँदैन ।’