२०८२ भाद्र २० गते शुक्रवार
२०८२ भाद्र २० गते शुक्रवार
काठमाडौं । डोनाल्ड ट्रम्प दोस्रोपटक अमेरिकाको राष्ट्रपति भएयता ७० जना नेपालीलाई अमेरिकाले ‘डिपोर्ट’ गरेको छ ।
ट्रम्पले २०२५ जनवरी २० मा राष्ट्रपतिको शपथ लिएका थिए । २०२५ को जनवरी २० देखि मार्च १२ सम्मको अवधिमा अमेरिकाले ७० नेपालीलाई डिपोर्ट गरेको हो ।
“सन् २०२५ जनवरी २० देखि मार्च १२ सम्मको अवधिमा ७० जना नेपाली अमेरिकाबाट डिपोर्ट भई आएका छन्,” त्रिभुवन अन्तर्राष्ट्रिय विमानस्थलस्थित अध्यागमन कार्यालयकी वरिष्ठ अध्यागमन अधिकृत सीता परियारले जानकारी दिइन् ।
पछिल्लोपटक यही मार्च ११ मा तीनजना र मार्च १२ मा दुईजना नेपालीलाई अमेरिकाले डिपोर्ट गरेको थियो । पछिल्लो पाँच दिनमा पाँच नेपाली अमेरिकाबाट डिपोर्ट भएर काठमाडौं आइपुगेका छन् ।
अमेरिकी डिपोर्टमा परेकाहरूलाई अध्यागमन कार्यालयले विमानस्थलबाटै नेपाल प्रहरीलाई बुझाउने गरेको छ । त्यसपछि प्रहरीले उनीहरूसँग आवश्यक सोधपुछ गर्दै आएको छ । अवैधरूपमा अमेरिका गएकाले उनीहरूसँग प्रहरीले मानव तस्करबारे सूचना लिने गरेको छ ।
अमरिकाले डिपोर्ट भएकाहरूमाथि अवैधरूपमा अमेरिका प्रवेश गरेको, गलत मनसायले अमेरिकामा बसेको र बिना भिसा बसेकोजस्ता आरोप लगाउने गरेको छ ।
ट्रम्पले राष्ट्रपति निर्वाचन अभियानकै क्रममा आप्रवासीमाथि कडाइ गर्ने घोषणा गरेका थिए । निर्वाचित भएपछि राष्ट्रपतिको शपथ लिएलगत्तै उनले अवैध आप्रवासीलाई निष्कासन गर्ने सम्बन्धी एक कार्यकारी आदेशमा हस्ताक्षर गरेका थिए ।
त्यसपछि ट्रम्प प्रशासनले निष्कासित गर्ने एकहजार ३६५ नेपालीसहित १४ लाख ४५ हजार ५४९ जना आप्रवासीको सूची सार्वजनिक गरेको थियो । उनीहरू सबैमाथि अवैध तरिकाले अमेरिकामा बसोबास गरेको आरोप लगाइएको थियो ।
सन् २०२४ मा अमेरिकाले ३५ जना नेपालीलाई डिपोर्ट गरेको थियो । जो बाइडेन राष्ट्रपति हुँदा एक वर्षको अवधिमा जति संख्यामा नेपाली अमेरिकाबाट डिपोर्ट भएका थिए, ट्रम्प राष्ट्रपति भएपछिको करिब तीन महिनामा त्यसको दुईगुणा बढी नेपाली अमेरिकाबाट डिपोर्ट भएका छन् ।
ट्रम्पले दोस्रोपटक अमेरिकाको राष्ट्रपतिको शपथ लिएपछिको ८६ दिनमा ७० जना नेपाली डिपोर्टमा परेका छन् ।
© 2025 All right reserved to khabarcnter.com | Site By : Sobij
