२०८२ कार्तिक २९ गते शनिवार
२०८२ कार्तिक २९ गते शनिवार
सप्तरी। सप्तरीको कञ्चनरुप नगरपालिकामा एक १७ वर्षीया किशोरीमाथि सामुहिक बलात्कार भएको छ । चार जनाको समूहले ती किशोरीलाई घरबाट जबरजस्ती उठाएर घर नजिकैको एक पुरानो घरमा लगी बलात्कार गरेको पीडितले बताएकी छिन् ।
पीडितको जाहेरीपछि आरोपी दिपेश सुवेदी, सुदीप भुजेल, मनोज विक र कैलाश भनिने टेकराज पोखरेललाई प्रहरीले नियन्त्रणमा लिएको छ । पीडित किशोरीका अनुसार आफूलाई बलात्कार गर्नेमध्येका एक जनालाई तिहार टीका लगाई दिएको पनि सम्झाएकी थिइन् ।
‘तपाईंहरू मेरो दाइ जस्तै हो, तिहारमा तपाईंलाई लगाएको टीकाको कम्तीमा लाज राख्नुस् भनेँ तर केही सुनेनन्, कुटपिट गर्दै मेरो अस्मिता लुटिरहे,’ पीडित किशोरीले भनिन् ।
गत असार २९ गते राति साढे १० बजेतिर ती किशोरीलाई भेट्न एक जना साथी आएका थिए । त्यसलगत्तै चार आरोपी छिरेर किशोरी र उनका साथीलाई कुटपिट समेत गरे ।
किशोरी र उनका साथीको तस्बिर खिचेर सार्वजनिक गर्ने उनीहरूले धम्की दिएको पाइएको इलाका प्रहरी कार्यालय कञ्चनपुरका डीएसपी दीपककुमार रायले बताए । त्यसपछि किशोरीका साथीलाई घरमै थुनेर नजिकै रहेको घरमा लगेर सामुहिक बलात्कार गरेको घटना सार्वजनिक भएको हो ।
आरोपी मध्येका कैलाश भनिने टेकराज पोखरेलको निर्देशनमा तीन जनाले आफूलाई बलात्कार गरेको किशोरीले प्रहरीमा दिएको जाहेरीमा उल्लेख छ । बलात्कारपछि किशोरीलाई कुटपिट गर्दै घरमा लगेर छोडिदिएको प्रहरीले जनाएको छ । उनीहरूले घटना सार्वजनिक गरे ज्यान मार्ने धम्की समेत दिएको पीडितले बताएकी छिन् ।
ज्याला मजदुरी गरी जीविकोपार्जन गर्ने किशोरीका बुवा कामका सिलसिलामा जनकपुर गएका थिए । किशोरीकी आमा र बहिनीलाई अर्को कोठा राखेर चुकुल लगाइ आरोपीहरूले थुनेका थिए ।
सामुहिक बलात्कारको घटना किशोरीले पहिले घरपरिवार र छरछिमेकीलाई बताएपछि सोमबार इलाका प्रहरी कार्यालय कञ्चनपुरमा जाहेरी दिएकी थिइन् । डीएसपी रायका अनुसार पक्राउ परेका चारै जनालाई मंगलबार अदालतबाट म्याद थप गराई अनुसन्धान सुरु गरिने डीएसपी रायले जानकारी दिए ।
© 2025 All right reserved to khabarcnter.com | Site By : Sobij
