२०८२ मंसिर २ गते मंगलवार
२०८२ मंसिर २ गते मंगलवार
राष्ट्रिय योजना आयोगका उपाध्यक्ष डा. मीनबहादुर श्रेष्ठ र दक्षिण कोरियाका पूर्वमन्त्री डा. ली नाम कीबीच भेटवार्ता भएको छ ।
सिंहदरबारस्थित आयोगको कार्यालयमा भएको भेटवार्तामा राष्ट्रिय योजना आयोगका उपाध्यक्ष श्रेष्ठले नेपालप्रतिको सद्भावको लागि धन्यवाद दिनुहुँदै नेपालले पूर्वमन्त्री लीजस्तै लगानीकर्तालाई छिट्टै आह्वान गर्ने बताउनुभयो ।
उपाध्यक्ष श्रेष्ठले सन् १९५५ ताका नेपालले कोरियालाई खाद्यान्नलगायत सहयोग गरेको विषयलाई स्मरण गर्दै नेपाल विगतमा कमजोर नभए पनि पछिल्ला केही दशकमा राजनीतिक अस्थिरताले गर्दा आर्थिक र विकासमा पछि परेको धारणा व्यक्त गर्नुभयो ।
सो अवसरमा डा. कीले नेपाल सरकारले लगानीमैत्री वातावरण तयार गरेमा कोरियालगायत विश्वभरको लगानी नेपालमा ल्याउन सकिने बताउनुभयो ।
कोरियाली सरकारका आर्थिक योजना विभागलगायत विभिन्न निकायमा झण्डै चार दशक कार्य गर्नुभएका लिले देशको विकास हुन त्यहाँको बलियो र दुरदर्शीताको मुख्य भूमिका हुने र कोरिया पनि त्यही कारण आज विश्वको विकसित राष्ट्र बनेको बताउनुभयो ।
नेपालले पनि कोरियाको प्रविधि र लगानी भित्र्याएर विकास गर्न सक्ने उहाँले बताउनुभयो । हाल कोरिया–एसिया इकोनमिक कोअपरेसन एसोसिएसनका अध्यक्ष समेत रहेका लिले आफ्नो देशले पनि पहिले वैदेशिक सहायता, प्रविधि र लगानी ल्याएर विकास गरेको स्मरण गर्नुभयो ।
भेटघाटमा सङ्घका पूर्व उपाध्यक्ष सोनाम लामा, महासचिव जानकी गुरुङ, कार्यकारी निर्देशक राजेश राणा, दिपेश खत्री, रोपवे नेपालका अध्यक्ष गुणराज ढकाल र लक्ष्मी बैङ्कका सञ्चालक दिनेश पौड्याललगायतकाे उपस्थिति रहेको थियो ।
© 2025 All right reserved to khabarcnter.com | Site By : Sobij
