२०८२ मंसिर ३ गते बुधवार
२०८२ मंसिर ३ गते बुधवार
काठमाडौँ । नेपाली कांग्रेसले आगामी वैशाख १० गते हुने प्रतिनिधिसभा सदस्य उपनिर्वाचनका लागि उम्मेदवारको टुङ्गो लगाएको छ।
सानेपास्थित पार्टी केन्द्रीय कार्यालयमा आज बसेको कार्यसम्पादन समितिको बैठकले चितवन-२, बारा-२ र तनहुँ-१ का लागि उम्मेदवारको टुङ्गो लगाएको हो।
बैठको निर्णय अनुसार पार्टीले चितवन-२ मा पार्टीको जिल्ला सभापतिसमेत रहेका जीतनारायण श्रेष्ठ र तनहुँ-१ मा गोविन्द भट्टराईलाई उम्मेदवार बनाउने भएको छ।
यस्तै, पार्टीले बारा-२ मा जनता सामाजवादी पार्टी (जसपा)का उपेन्द्र यादवलाई छाड्ने निर्णय गरेको छ। चितवन-२ मा यसअघिका प्रतिनिधि सभा सदस्य रवि लामिछाने नागरिकता विवादमा दोषी ठहर भई पदमुक्त भएपछि यो क्षेत्रमा उपनिर्वाचन हुन लागेको हो।
यस्तै, बारा-२ मा रामसहायप्रसाद यादव प्रतिनिधिसभा सदस्यमा निर्वाचित भएका थिए। जसपाबाट उम्मेदवारी दिएर विजयी भएका उनी उपराष्ट्रपतिमा निर्वाचित भएपछि सो क्षेत्रमा उपनिर्वाचन हुन लागेको हो।
यसैगरी, तनहुँ-१ मा रामचन्द्र पौडेल प्रतिनिधिसभा सदस्यमा निर्वाचित भएका थिए। नेपाली कांग्रेसबाट विजयी भएका उनी राष्ट्रपतिमा निर्वाचित भएपछि सो क्षेत्रमा उपनिर्वाचन हुन लागेको हो।
© 2025 All right reserved to khabarcnter.com | Site By : Sobij
