२०८३ श्रावण २९ गते शुक्रवार
२०८३ श्रावण २९ गते शुक्रवार
.gif)
काठमाडौं । सिटिजन्स बैंक इन्टरनेसनलले आर्थिक वर्ष २०८२/८३ मा वित्तीय प्रदर्शनमा उल्लेख्य सुधार गरेको छ । बैंकले सार्वजनिक गरेको वित्तीय विवरणअनुसार बैंकको खुद नाफा ६३.०५ प्रतिशतले वृद्धि भई २ अर्ब ९ करोड ८६ लाख रुपैयाँ पुगेको छ ।
अघिल्लो आर्थिक वर्षमा बैंकले १ अर्ब २८ करोड ७१ लाख रुपैयाँ खुद नाफा कमाएको थियो । एक वर्षको अवधिमा बैंकको नाफा ८१ करोड १५ लाख रुपैयाँभन्दा बढीले बढेको हो ।
नाफामा भएको वृद्धिसँगै बैंकको प्रतिसेयर आम्दानी (ईपीएस) पनि सुधार भएको छ । अघिल्लो वर्ष ८ रुपैयाँ ७१ पैसा रहेको ईपीएस बढेर १३ रुपैयाँ ५३ पैसा पुगेको छ । यसले बैंकको आम्दानी क्षमता बलियो बन्दै गएको संकेत गर्छ ।
बैंकको पूँजी संरचनामा समेत सुधार देखिएको छ । टायर–१ क्यापिटल एडुक्वेसी रेसियो ८.९५ प्रतिशतबाट बढेर ९.२३ प्रतिशत पुगेको छ भने समग्र क्यापिटल एडुक्वेसी रेसियो १२.४७ प्रतिशत कायम रहेको छ ।
बैंकको नाफा वृद्धिमा इम्पेयरमेन्ट चार्जमा आएको ठूलो गिरावट मुख्य कारण बनेको छ । अघिल्लो वर्ष २ अर्ब ६८ करोड रुपैयाँ रहेको इम्पेयरमेन्ट खर्च यस वर्ष घटेर ८२ करोड ९४ लाख रुपैयाँमा सीमित भएको छ । करिब १ अर्ब ८५ करोड रुपैयाँ बराबरको खर्च घट्दा बैंकको नाफामा प्रत्यक्ष सकारात्मक प्रभाव परेको हो ।
त्यस्तै, बैंकको निक्षेप लागत ४.४९ प्रतिशतबाट घटेर ३.३६ प्रतिशत र आधार दर ६.२५ प्रतिशतबाट घटेर ५.०४ प्रतिशतमा आएको छ । यसले बैंकको फन्डिङ लागत व्यवस्थापनमा सुधार भएको देखाउँछ ।
बैंकको खुद फि तथा कमिसन आय ६.३३ प्रतिशत र नेट ट्रेडिङ तथा अन्य सञ्चालन आम्दानी ५१.१२ प्रतिशतले बढेको छ ।
यद्यपि, खुद नाफा २ अर्ब ९ करोड ८६ लाख रुपैयाँ भए पनि नियामकीय समायोजनपछि बैंकको वितरणयोग्य नाफा ५२ करोड ३१ लाख रुपैयाँ कायम भएको छ । यसबाट करिब ३.३७ प्रतिशत लाभांश वितरण गर्न सकिने देखिएको छ ।
वितरणयोग्य नाफामा कमी आउनुको मुख्य कारण डिफर्ड ट्याक्स एसेट्स, गैरबैंकिङ सम्पत्ति तथा अन्य नियामकीय शीर्षकमा गरिएको समायोजन हो । डिफर्ड ट्याक्स एसेट्समा ४३ करोड ३८ लाख रुपैयाँ र गैरबैंकिङ सम्पत्तिमा २९ करोड १० लाख रुपैयाँ बराबरको समायोजन गरिएको बैंकले जनाएको छ ।
समग्रमा, नाफा वृद्धि, ईपीएस सुधार, पूँजी आधार मजबुत हुनु तथा खर्च नियन्त्रणमा आएको सुधारले सिटिजन्स बैंकको आर्थिक वर्ष २०८२/८३ को वित्तीय अवस्था सकारात्मक देखिएको छ ।
© 2026 All right reserved to khabarcnter.com | Site By : Sobij
