२०८२ चैत्र १० गते मंगलवार
२०८२ चैत्र १० गते मंगलवार
काठमाडौं । इरानी सेनाको कब्जामा रहेका ३३ वर्षीय अमृत झाको सकुशल रिहाइका लागि पहल गरिदिन उनको परिवारले सरकारसँग आग्रह गरेको छ ।
उदयपुरको त्रियुगा नगरपालिका–११ का ३३ वर्षीय अमृत झा इरानको ब्ल्याक सी मरिन एलएलसी कम्पनीमा कार्यरत छन् । उनी पानीजहाजका चालकको भूमिकामा छन् ।
दुबईबाट इरानतर्फ इन्धन लिन गएको र उताबाट फर्किने क्रममा उनलाई इरानी सेनाले बठदर अब्बाबसबाट पक्राउ गरेको अमृतकी दिदी पूजा झाले बताइन् ।
अमृत झाका आफन्तले सोमबार यही विषयलाई लिएर परराष्ट्रमन्त्री बलानन्द शर्मा र सचिव अमृतबहादुर राईसँग भेटेका थिए ।
भेटको क्रममा अमृतका भिनाजु राजेशकुमार झाले तेल ढुवानी गरेर फर्किने क्रममा इजरायल–अमेरिका आक्रमणपछिको तनावका कारण सो क्षेत्रमा अवस्था जटिल भई झालाई नियन्त्रणमा लिएको बुझिएको बताए ।
पक्राउपछि अमृतको सुरक्षा तथा अवस्थाबारे कुनै स्पष्ट जानकारी प्राप्त हुन नसकेको विषयलाई उनले मन्त्री शर्मा र सचिव राई समक्ष राखेका थिए ।
जबाफमा मन्त्री शर्माले आफू अब एकदुई दिनमात्र बहाल रहने भन्दै अब बन्ने सरकारले नै यी सबै समस्या सम्बोधन गर्ने प्रस्ट पारे । यद्यपि परराष्ट्र मन्त्रालयले आफ्ना नियोगमार्फत अमृतको अवस्थाबारे बुझ्ने प्रयास जारी राखेको उनले जानकारी दिए ।
सचिव राईले पनि सम्पूर्ण सूत्रबाट अमृतको रिहाइका लागि पहल भइरहेको बताएका थिए ।
© 2026 All right reserved to khabarcnter.com | Site By : Sobij
