२०८२ मंसिर ४ गते बिहिवार
२०८२ मंसिर ४ गते बिहिवार
काठमाडौं । विमान दुर्घटनामा ज्यान गुमाएका परिवारलाई क्षतिपूर्ति तिराउने फैसलाविरुद्ध यूएस बङ्गला एयरलाइन्स कम्पनी उच्च अदालत पाटन पुगेको छ । जिल्ला अदालत काठमाडौंले दुर्घटनामा ज्यान गुमाएका १७ परिवारले क्षतिपूर्ति पाउनुपर्ने पक्षमा फैसला गरेपछि विमान कम्पनी उच्च अदालत पुगेको हो ।
युएस बङ्गला एयरलाइन्सले दायर गरेको निवेदनमाथि उच्च अदालत पाटनका न्यायाधीशद्वय सोमकान्त मैनाली र कृष्ण मुरारी शिवाकोटीको इजलासमा सुनुवाइका लागि पेसी तोकिएको छ ।
२०७४ फागुन २८ गते (सन् २०१८ मार्च १२) गते काठमाडौंको त्रिभुवन अन्तर्राष्ट्रिय विमानस्थलमा अवतरणका क्रममा यूएस बङ्गला एयरलाइन्सको विमान दुर्घटना भएको थियो । काठमाडौं जिल्ला अदालतका न्यायाधीश दिवाकर भट्टको इजलासले फैसला गरेको थियो ।
क्षतिपूर्ति मृतकको पृष्ठभूमि र उमेर हेरेर तय गरिएको छ । सो दुर्घटनामा ज्यान गुमाएका बङ्गलादेशमा एमबीबीएस अध्ययन गर्दै गरेका विद्यार्थीहरूको हकमा १ लाख ७० हजार ३८२ अमेरिकी डलर अर्थात् २ करोड ३४ लाख रुपैयाँ र एमबीबीएस डाक्टरको हकमा १ लाख ७९ हजार ४१८ अमेरिकी डलर (२ करोड ४७ लाख ३२ हजार रुपैयाँ) तिर्नुपर्ने फैसलामा भनिएको थियो ।
एक न्युरो सर्जनको हकमा २ लाख ७७ हजार ५४८ अमेरिकी डलर (३ करोड ६७ लाख ४३ हजार रुपैयाँ), एक वृद्ध नर्सको हकमा ४५ हजार ३०१ डलर (६२ लाख ४४ हजार रुपैयाँ) र एक जना घाइतेको हकमा ४४ हजार २९० अमेरिकी डलर (६१ लाख ५ हजार रुपैयाँ) तिर्नुपर्ने जिल्ला अदालतले फैसला गरेको हो ।
त्यसैगरी, हिमालय एयरलाइन्सका कर्मचारी प्रसन्न पाण्डेको परिवारले १ लाख ७ हजार १७० डलर (१ करोड ४७ लाख ४४ हजार रुपैयाँ) क्षतिपूर्ति पाउने अदालतले फैसला गरेको छ । अदालतले हवाई यात्रामा दायित्व बेहोर्नेसम्बन्धी अन्तर्राष्ट्रिय सन्धि ‘वार्सा कन्भेन्सन १९२९’ अनुसार फैसला गरेको हो ।
बङ्गलादेशबाट एमबीबीएस अध्ययन गरेका विद्यार्थी, एमबीबीएस चिकित्सक, सोही पेसामा रहेका नर्स र चिकित्सकहरू रहेको उक्त विमान दुर्घटना भएपछि उनीहरूका परिवारले क्षतिपूर्तिको माग गर्दै उक्त कम्पनीलाई समेत विपक्षी बनाएर २०७६ मा अदालतमा मुद्दा दायर थिए ।
© 2025 All right reserved to khabarcnter.com | Site By : Sobij
