२०८२ भाद्र १ गते आइतवार
२०८२ भाद्र १ गते आइतवार
काठमाडौं । त्रिभुवन अन्तर्राष्ट्रिय विमानस्थलबाट भिजिट भिसामा विदेश जान खोज्नेहरूको कागजात शङ्कास्पद भेटिएमा त्यसबारे अनुसन्धान गर्न प्रहरीलाई जिम्मा दिने निर्णय गरिएको छ ।
विदेश जान खोज्ने व्यक्ति र कागजातबारे अनुसन्धान गर्न प्रहरीलाई जिम्मा लगाइने अध्यागमन विभागका महानिर्देशक रामचन्द्र तिवारीले बताएका छन् । शङ्कास्पद लाग्नासाथ कागजात, राहदानीसहित प्रहरीकहाँ जिम्मा लगाइने उनले जानकारी दिएका छन् ।
अध्यागमन विभागका अधिकारीहरूले त्यसबारे नेपाल प्रहरी, नागरिक उड्डन प्राधिकरण, पर्यटन मन्त्रालय र एयरलाइन्स कम्पनीहरूसँग छलफल गरेका छन् । शुक्रबार त्यसबारे औपचारिक निर्णय गरिने महानिर्देशक तिवारीले जानकारी दिएका छन् । उनका अनुसार भिजिट भिसाको नाममा भएको विकृति सुधार्न यस्तो निर्णय लिइएको हो ।
भिजिट तथा पर्यटक भिसामा विदेश यात्रामा जाँदा ६ प्रकारका कागजात त्रिभुवन अन्तर्राष्ट्रिय विमानस्थल अध्यागमन कार्यालयमा बुझाउनुपर्छ । पर्यटक भिसामा आफन्त भेट्न अथवा घुम्नकै लागि जानेहरूका लागि त्यस्ता कागजातहरू जुटाउन धौधौ पर्छ ।
विभागका महानिर्देशक तिवारीले जिम्मेवारी सम्हालेयता अध्यागमनमा मात्र सुधार गरेर भिजिट भिसाका नाममा देखिएको समस्या समाधान नहुने भन्दै विभिन्न पक्षसँग छलफल गरिरहेका छन् । त्यही छलफलपछि यी निर्णयहरु लिइएको उनले बताएका छन् ।
© 2025 All right reserved to khabarcnter.com | Site By : Sobij
