२०८२ भाद्र १५ गते आइतवार
२०८२ भाद्र १५ गते आइतवार
हिरोमा भन्ने वित्तिकै हामी सोच्छौं– आकर्षक जिउडाल, सुहाउँदो हाइट र सुन्दर अनुहार ।
कलाकार जितु नेपाल पनि यही सोच्थे । यी गुण आफूमा नभएकाले उनलाई हिरो हुन्छु भन्ने कहिल्यै लागेको थिएन ।
त्यसैले होला, डा. कपिल रिजालले आफ्नो फिल्म ‘ह्यारीकी प्यारी’मा हिरोको भूमिका अफर गर्दा जितुले भनेका थिए, ‘म कहाँ हिरो हो र रु मलाई हिरो सुहाउँदैन, नजिस्क्याउनु न ।’
निर्देशक रिजालले ‘अभिनय गराउने जिम्मा मेरो हो, तपाईं गर्न सक्नुहुन्छ । अभिनयका लागि तयार हुनु’ भनेपछि जितु होमिएका थिए ।
दोस्रो फिल्म ‘ज्वाइँ साब’को किस्सा पनि त्यस्तैत्यस्तै थियो । तेस्रो फिल्म ‘कार्साङ’मा आएर जितुले हिरोको परिभाषा बुझिसकेका थिए– हिरो व्यक्ति होइन, चरित्र हो ।
त्यसैले अहिले उनी आफूलाई फिल्मभित्र हिरो र बाहिर कलाकार भन्न थालेका छन् । ‘म पहिले हिरोको बारेमा जे सोच्थेँ, त्यो पहिलेको कुरो थियो । त्यो बेलाको माहोल त्यस्तै थियो,’ जितुले भने, ‘अहिलेको माहोल त, कथावस्तुको छ । हामी पनि हिरो हुन सक्छौँ भन्ने बुझियो ।’ चरित्रका कारण आफू पनि हिरो हुन सकेको जितुको बुझाइ छ ।
‘कार्साङ’ आगामी शुक्रबारबाट सार्वजनिक प्रदर्शनमा आउने फिल्म हो । फिल्ममा दयाहाङ राई र जितुको मुख्य भूमिका छ । दयाहाङ यतिबेला विदेशमा छन् । त्यसैले फिल्मको प्रचारप्रसार जितु भरपुर मेहनत गरिरहेका छन् ।
प्रचारका सिलसिलामा रातोपाटीसँग ठोक्किएका जितुले ‘कार्साङ’ शेर्पाहरूको कल्चरमा निर्माण भएको जानकारी दिए ।
‘शेर्पाहरूको पूजापाठसँग सम्बन्धित अनेक कल्चर रहेछ । तीमध्येकै एक झाँक्री कल्चर पनि हो र त्यही कल्चरमा आधारित रहेर फिल्म निर्माण भएको छ,’ जितुले थपे ।
फिल्ममा जितुले दलित समुदायको पात्र माइला विकको भूमिका निर्वाह गरेका छन् । आफ्नो पात्रले सिन्धुपाल्चोकको दलित समुदायको प्रतिनिधित्व गर्ने जितुको भनाइ छ ।
‘कार्साङ’ यम शेर्पाले निर्देशन गरेका हुन् । निर्देशनमा शेर्पाको यो डेब्यु फिल्म हो । यमले फिल्म अध्ययनसहित निर्देशनमा हात बढाएका हुन् ।
जितुले यो फिल्म अभिनय गर्नुको कारण हो– कथावस्तु र निर्देशक । ‘सिन्धुपाल्चोककै भाइ यम शेर्पाले निर्देशनमा डेब्यु गर्न लागेको भएर अभिनय गरेको हो’, उनले दोस्रो कारण खोले, ‘फिल्मको कथा पनि राम्रो र अन्यभन्दा फरक छ ।’
© 2025 All right reserved to khabarcnter.com | Site By : Sobij
