२०८२ मंसिर १३ गते शनिवार
२०८२ मंसिर १३ गते शनिवार
काठमाडौँ । पूर्व मन्त्री तथा काँग्रेस नेता मोहम्मद अफताब आलमविरुद्धका मुद्दाको पेशी हेर्न नमिल्नेमा राखिएको छ । शुक्रवार सर्वोच्च अदालतमा सुनुवाइका लागि पेशी तोकिएकामध्ये महत्त्वपूर्ण मुद्दा मध्ये आलमविरुद्धका मुद्दाको पेशी हेर्न नमिल्नेमा राखिएको हो भने नेपाल विद्युत् प्राधिकरणका तत्कालीन कार्यकारी निर्देशक हितेन्द्रदेव शाक्यको मुद्दा स्थगित भएको छ ।
विस्फोटक पर्दाथ बमसमेतको प्रयोग गरी ज्यान मार्ने उद्योगसम्बन्धी मोहम्मद अफताब आलमको मुद्दाको सुनुवाइका लागि न्यायाधीशद्वय दीपककुमार कार्की र हरिप्रसाद फुयाँलको इजलासमा पेशी तोकिएकोमा शुक्रवार हेर्न नमिल्नेमा राखिएको हो ।
२०६४ साल चैत २७ गते रौतहटमा बम विस्फोट गराई व्यक्ति हत्यामा संलग्न भएको मुद्दामा रौतहट जिल्ला अदालतले आलमलाई पुर्पक्षका लागि थुनामा राख्न आदेश दिएसँगै आदेशविरुद्ध आलम सर्वोच्च अदालत पुगेकोमा पेशी सरिरहेको छ ।
विद्युत प्राधिकरणको कार्यकारी निर्देशकमा कुलमान घिसिङलाई नियुक्त गरेको विरुद्धमा परेको रिट उपर शुक्रबार सुनुवाइ हुन सकेन ।
प्रधानन्यायाधीश चोलेन्द्र शम्शेर जबरा आफैले सुनुवाई गर्नेगरी सो रिटको पेसी तोकिए पनि रिट निवेदकका कानुन व्यवसायीका तर्फबाट सुनुवाई स्थगितको माग भएपछि सुनुवाई हुन नसकिएको हो ।
यसअघि भदौ ८ मा प्रधानन्यायाधीश जबराले घिसिङ र शाक्यलाई नियुक्त गर्दाको सक्कल फायल झिकाउन आदेश गरेका थिए ।
मन्त्रिपरिषद्ले २०७७ माघ २६ मा शाक्यलाई प्राधिकरणको कार्यकारी निर्देशकमा नियुक्त गरेको थियो । २०७८ साउन २५ मा उनलाई त्यहाँबाट हटाएर जल तथा ऊर्जा आयोगको विशेषज्ञ सदस्यमा नियुक्त गरिएको थियो ।
© 2025 All right reserved to khabarcnter.com | Site By : Sobij
