२०८२ मंसिर १३ गते शनिवार
२०८२ मंसिर १३ गते शनिवार
काठमाडौँ । सभामुख अग्निप्रसाद सापकोटा, निर्वाचन आयोग र लुम्बिनी प्रदेश सभाविरुद्ध प्रमुख प्रतिपक्षी दल एमालेका अध्यक्ष केपी शर्मा ओलीले सर्वोच्च अदालतमा दायर गरेका रिट निवेदनको पेसी प्रधानन्यायाधीश चोलेन्द्र शम्शेर जबराको इजलासमा तोकिएको छ ।
एमालेका तत्कालीन सांसदहरू माधवकुमार नेपाललगायत १४ जनालाई केन्द्रीय कमिटीको सिफारिस बमोजिम कारबाही नगरेको भन्दै सभामुख सापकोटाविरुद्ध, एमाले विभाजनमा कानुनविपरीत गतिविधि गरेको भन्दै निर्वाचन आयोगविरुद्ध र प्रदेश सभाका २ जना सूर्य चुनाव चिह्न लिएर निर्वाचित भएकालाई कारबाही सिफारिस गर्दा पनि पदमुक्त नगरेको भन्दै ओलीले सर्वोच्च अदालतमा रिट दायर गरेका थिए । तीनवटै रिटको पेसी मंगलबारका लागि प्रधानन्यायाधीश जबराको इजलासमा तोकिएको छ ।
ओलीले भदौ १७ गते रिट दायर गरेका थिए । भदौ १८ गते न्यायाधीश मीरा खड्काको इजलासमा उक्त मुद्दाको पेसी तोकिएकोमा बेन्च बस्न नसक्दा सुनुवाइ भएको थिएन । ती रिट निवेदनको पेसी भदौ २० गते प्रधानन्यायाधीश जबराको इजलासमा तोकिएको थियो । उक्त दिन प्रधानन्यायाधीशले रिट निवेदन हेर्न नभ्याउँदा सुनुवाइ हुन सकेको थिएन ।
मंगलबारको पेसीमा प्रधानन्यायाधीशको इजलासमा ओलीले दायर गरेका रिटको सुनुवाइ ८, ९ र १० नम्बरमा रहेको छ ।
© 2025 All right reserved to khabarcnter.com | Site By : Sobij
