२०८२ मंसिर १३ गते शनिवार
२०८२ मंसिर १३ गते शनिवार
काठमाण्डौ । वाणिज्य आपूर्ति तथा उपभोक्ता संरक्षण विभागले चाडबाडलाई लक्षित गरी बजार अनुगमन गर्ने भएको छ ।
देशभरका आफू मातहतका निकायलाई सक्रिय बनाएर र जनशक्ति थप गरेर अनुगमनलाई प्रभावकारी बनाइने विभागका प्रवक्ता शिवराज सेढाईँले जानकारी दिए । अबको एकरदुई दिनमा प्रभावकारी अनुगमन सुरु गर्ने उहाँको दाबी छ ।
सेढाईँका अनुसार अबको अनुगमन चाडपर्वमा खरिद बिक्री हुने वस्तुमा केन्द्रित हुनेछ । चाडपर्वलाई लक्षित गरी अनुगमनका लागि काठमाण्डौ उपत्यकामा थप २५ जना जनशक्ति सङ्घीय तथा सामान्य प्रशासन मन्त्रालयसँग माग गरिएको उहाँले जानकारी दिए ।
विभाग मातहत रहेका देशभरका पाँच वटा कार्यालय र हरेक जिल्लाको सहायक प्रमुख जिल्ला अधिकारीको संयोजकत्वमा देशभर नै अनुगमन हुने उहाँले बताए । तीज र दशैँ नजिकिएकाले अबको अनुगमन, गरगहना, कपडा, मासु र दैनिक उपभोग्य वस्तुमा केन्द्रित हुने उहाँको भनाइ छ ।
चाडपर्वको समयमा उपभोक्ता र व्यापारीको बढी भेटघाट हुने भएकाले यो समयमा उपभोक्ताले गुनासो धेरै गर्ने भएकाले अनुगमनलाई बढाइने गरेको उहाँले बताउनु भयो । अरु समयमा पनि विभागले नियमित रुपमा बजार अनुगमन गर्दै आएको उहाँले दाबी गर्नु भयो । चाडपर्वको समयमा पालिकाहरुले पनि अनुगमनलाई थप प्रभावकारी बनाउनुपर्ने उहाँको भनाइ छ । अहिले पनि बजार भाउ महँगो भएको, कालोबजारी भइरहेको गुनासो उपभोक्ताले गर्दै आएका छन् ।
चाडपर्वमा झन् बढी यस्ता घटना हुन सक्ने भन्दै उपभोक्ताले तत्काल बजार अनुगमन प्रभावकारी बनाउन माग गर्दै आएका छन् ।
© 2025 All right reserved to khabarcnter.com | Site By : Sobij
