२०८२ मंसिर १३ गते शनिवार
२०८२ मंसिर १३ गते शनिवार
काठमाडौं । संघीय संसदको शिक्षा समितिले स्वास्थ्य तथा जनसंख्या मन्त्रालयलाई कक्षा १२ का विद्यार्थीलाई कोरोना भाइरसविरुद्ध खोप दिने व्यवस्था गर्न निर्दशन दिएको छ।
आज बसेको समितिको बैठकमा समिती सभापति जयपुरी घर्तीले स्वास्थ्य राज्यमन्त्री उमेश श्रेष्ठलाई कक्षा १२ का विद्यार्थीहरुलाई छिटो भन्दा छिटो खोपको व्यवस्था गर्न निर्देशन दिएकी हुन्। कोभिड १९ संक्रमणको जोखिम कायमै रहेकोले कक्षा १२ को परीक्षा स्थगित गरिएको थियो।
घर्तीले खोप दिएर परिक्षा सञ्चालन गर्न समेत निर्देशन दिएकी छिन्। सरकारले केहीदिन अघिमात्रै कक्षा ११ र १२ का विद्यार्थीलाई प्रवेश पत्रका आधारमा खोप दिएको थियो। तर, सबै विद्यार्थीले खोप नपाएको भन्दै समितिले फेरि खोप दिन निर्देशन दिएको हो।
होम सेन्टरबाटै परीक्षा
कक्षा १२ को परीक्षा होम सेन्टरबाटै हुने भएको छ । कोरोना भाइरसको संक्रमणको जोखिमलाई ख्याल गरेर यस पटक होमसेन्टरबाटै परीक्षा लिने तय भएको राष्ट्रिय परीक्षा बोर्डका सदस्य सचिव दुर्गा अर्यालले जानकारी दिए ।
बुधबार संसदको शिक्षा तथा स्वास्थ समितिको बैठकमा बोल्दै सदस्य सचिव अर्यालले भने, “अर्को ठाउँमा जानु पर्दा यातायातको समस्या हुने, विद्यार्थीले कोठा खोजेर बस्नुपर्ने, यस्ता कार्यले कोरोना जोखिमलाई पनि थप बढाउन सक्ने भएकाले होम सेन्टरबाट गर्नुपर्ने भएको छ ।
कक्षा १० को आन्तरिक मूल्यांकनबाट नतिजा निकाल्ने तयारी भएको तर १२ को भने आन्तरिक मूल्यांकनबाट नभइ भौतिक उपस्थितिमै परीक्षा लिनुपर्ने सुझाव आएकोले होम सेन्टरबाट परीक्षा लिन लागेको सदस्य सचिव अर्यालले जानकारी दिए ।
उनका अनुसार कक्षा १२ का २८ भन्दा कम विद्यार्थी भएका एक हजार विद्यालय छन्, ५० भन्दा कम विद्यार्थी भएका दुई हजार ३००, एक सयभन्दा कम विद्यार्थी भएका तीन हजार ४०० र ५०० भन्दा बढी विद्यार्थी भएका विद्यालय ८९ वटा छन ।
© 2025 All right reserved to khabarcnter.com | Site By : Sobij
