२०८२ मंसिर १४ गते आइतवार
२०८२ मंसिर १४ गते आइतवार
लमजुङ । लमजुङ जिल्लाका ८ स्थानीय तहमा आर्थिक वर्ष २०७६र७७ मा २४ करोड ७२ लाख ८६ हजार रुपैयाँ बेरुजु निस्किएको छ । उक्त वर्ष कार्यान्वयनमा रहेको ७ अर्ब ३६ करोड ३६ लाख ४१ हजार रुपैयाँ बजेटको लेखा परीक्षण भएकोमा ३।३५ प्रतिशत रकम बेरुजु निस्किएको हो ।
महालेखा परीक्षकको ५८ औं वार्षिक प्रतिवेदनअनुसार सबैभन्दा बढी मर्स्याङ्दी गाउँपालिकामा ६.८८ प्रतिशत रकम अर्थात् ६ करोड ४२ लाख ४८ हजार रुपैयाँ बेरुजु रहेको छ । सबैभन्दा कम क्ब्होलासोंथर गाउँपालिकामा ०.७७ प्रतिशत रकम बेरुजु रहेको छ । क्ब्होलासोंथर, दोर्दी र दूधपोखरी गाउँपालिकामा १ प्रतिशतभन्दा कम रकम बेरुजु रहेको महालेखा परीक्षकको वार्षिक प्रतिवेदनमा छ ।
राइनास नगरपालिकामा ५ करोड ९३ लाख ४३ हजार बेरुजु छ । बेंसीसहर नगरपालिकामा ५ करोड ७९ लाख ६९ हजार, मध्यनेपाल नगरपालिकामा ३ करोड ९१ लाख २३ हजार, सुन्दरबजार नगरपालिकाको १ करोड १० लाख ४६ हजार रुपैयाँ बेरुजु निस्किएको छ ।
क्ब्होलासोंथर गाउँपालिकामा ३७ लाख ७० हजार, दोर्दी गाउँपालिकामा ६९ लाख ३२ हजार रुपैयाँ, दूधपोखरी गाउँपालिकामा ४८ लाख ५५ हजार रुपैयाँ बेरुजु छ । मर्स्याङ्दी गाउँपालिका प्रमुख अर्जुन गुरुङले केही नीतिगत बेरुजु रहेको बताए ।
राइनास नगरपालिकाका प्रमुख प्रशासकीय अधिकृत रामचन्द्र अधिकारीले सैद्धान्तिक बेरुजु रहेको बताए । उनका अनुसार केही विद्यालयलाई दिइएको अनुदानको बेरुजु छ । ‘केहीको कागजातपत्र र प्रतिवेदनहरू पुगेको छैन । काम सकियो, निकासा रोकिदिनु भएन ।
हामी निर्णय गराएर ल्याउँछौं भनेपछि निकासा दिइयो । अहिले बेरुजुमा आएको छ,’ उनले भने । उनका अनुसार निकासा प्रक्रिया पूरा नहुँदा समस्या आएको छ । ‘केही असुलउपर गर्नुपर्ने बेरुजु पनि नभएका होइनन् । असुलउपर गर्नुपर्नेलाई पत्राचार गरेका छौं,’ उनले भने ।
© 2025 All right reserved to khabarcnter.com | Site By : Sobij
