२०८२ मंसिर १४ गते आइतवार
२०८२ मंसिर १४ गते आइतवार
काठमाण्डौ । सत्ता साझेदार जनता समाजवादी पार्टी नेपालका सांसद प्रदीप यादवले संसदबाट बहुमत प्राप्त प्रधानमन्त्री शेरबहादुर देउवालाई हेप्ने काम नगर्न प्रमुख प्रतिपक्ष दल नेकपा एमालेलाई चेतावनी दिएको छ ।
सांसद यादवले एमालेप्रति सङ्केत गर्दै संसदबाट बहुमत साबित गराउनुभएका प्रधानमन्त्री देउवालाई हेप्ने, घोच्नेलाई नागरिकले माफी नदिने पनि बताए । सोमवार प्रतिनिधि सभा बैठकमा बोल्दै उहाँले प्रधानमन्त्री देउवा नेतृत्वको गठबन्धनले आउँदो चुनावपछि पनि पाँच वर्ष सरकार चलाउने गरी नागरिकले म्यान्डेट दिने दाबी गरेका छन्।
उहाँले भन्नुभयो, ‘संसदमा बहुमत साबित गरेर भएको प्रधानमन्त्रीलाई परमादेशको प्रधानमन्त्री भनेर हेप्ने, घोच्ने ? त्यस्तालाई जनताले माफी दिने छैनन् । अब यो गठबन्धन सरकार १८ महिनाको मात्रै होइन, आउँदो चुनावपछि पनि पाँच वर्षका लागि निर्वाचित भएर आउनेछ । यो हाम्रो दाबी हो ।’
सांसद यादवले निवर्तमान प्रधानमन्त्री केपी शर्मा ओलीले संविधान विपरीत काम गरेर पनि वर्तमान सरकारलाई परमादेशको सरकार भनेर हास्यास्पद तर्क गरिरहेको दाबीसमेत गरे ।
उहाँले अफगानिस्तानमा रहेका नेपाली नागरिकलाई तत्काल हवाई उद्धार गर्न पनि सरकारलाई सचेत गराए । सरकारले भनेर होइन तत्काल उद्धार गरेर अफगानिस्तानमा रहेका नेपालीहरूको जीवन सुरक्षा गर्नुपर्ने सांसद यादवको भनाइ छ ।
© 2025 All right reserved to khabarcnter.com | Site By : Sobij
